ໃນລະຫວ່າງວັນທີ 28-29 ເມສາ 2026 ນີ້, ກອງປະຊຸມໃຫຍ່ຜູ້ແທນແນວລາວສ້າງຊາດ ທົ່ວປະເທດ ຄັ້ງທີ XII ໄດ້ໄຂຂຶ້ນຢ່າງເປັນທາງການ ແລະ ສະຫງ່າຜ່າເຜີຍ ພາຍໃຕ້ບັນຍາກາດທີ່ມີຄວາມໝາຍຄວາມສຳຄັນທາງປະຫວັດສາດ. ໃນໂອກາດອັນສະຫງ່າລາສີນີ້, ຄະນະພຣະສົງຜູ້ແທນແນວລາວສ້າງຊາດ ຈາກທົ່ວປະເທດ ໄດ້ພ້ອມກັນເຂົ້າຮ່ວມຢ່າງພ້ອມພຽງ.
ກອງປະຊຸມໃຫຍ່ໃນຄັ້ງນີ້ ເປັນເວທີອັນສຳຄັນໃນການທົບທວນຄືນ ຜົນງານການເຄື່ອນໄຫວ ແລະ ການເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດ ໃນໄລຍະຜ່ານມາ, ພ້ອມທັງກຳນົດທິດທາງແຜນການ, ຈຸດໝາຍສູ້ຊົນ ແລະ ໜ້າທີ່ຈຸດສຸມໃນຕໍ່ໜ້າ ເພື່ອເພີ່ມທະວີຄວາມສາມັກຄີເປັນເອກະພາບຂອງປະຊາຊົນລາວບັນດາເຜົ່າ, ຊັ້ນຄົນ, ເພດ-ໄວ ແລະ ສາສະໜາ ໃຫ້ເປັນປຶກແຜ່ນແໜ້ນໜາ.
ການເຂົ້າຮ່ວມຂອງຄະນະພຣະສົງຜູ້ແທນໃນຄັ້ງນີ້, ໄດ້ສະແດງໃຫ້ເຫັນເຖິງບົດບາດອັນສຳຄັນຍິ່ງຂອງພຣະພຸດທະສາສະໜາ ແລະ ອົງການຈັດຕັ້ງສົງ ໃນການເປັນເສົາຄ້ຳທາງດ້ານຈິດໃຈ, ການສຶກສາອົບຮົມສີລະທຳ-ຈັນຍາທຳ ໃຫ້ແກ່ສັງຄົມ, ແລະ ການມີສ່ວນຮ່ວມຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມດຽວກັນນັ້ນ, ຍັງເປັນການຢືນຢັນເຖິງຄວາມເປັນເອກະພາບ ພາຍໃຕ້ຫຼັງຄາເຮືອນອັນດຽວກັນຂອງແນວລາວສ້າງຊາດ ທີ່ສະເໝີພາບ ແລະ ກົມກຽວ.
ຕະຫຼອດໄລຍະ 2 ວັນຂອງກອງປະຊຸມ, ຄະນະພຣະສົງຜູ້ແທນ ໄດ້ຮ່ວມກັບບັນດາຜູ້ແທນສົມບູນ ຮັບຟັງການລາຍງານ, ຄົ້ນຄວ້າປະກອບຄຳຄິດຄຳເຫັນ ແລະ ຮ່ວມກັນຮັບຮອງເອົາເອກະສານສຳຄັນຕ່າງໆ ຂອງກອງປະຊຸມໃຫຍ່, ເພື່ອແນໃສ່ເຮັດໃຫ້ວຽກງານແນວໂຮມໃນຮູບແບບໃໝ່ ມີຄວາມເຂັ້ມແຂງ, ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ຢ່າງມີປະສິດທິຜົນສູງ.